Nadikathi : Marathi Audio book written by Vasanti Muzumdar. Narrated by Swati Subramaniam, Sumukhi Pendse, Ajit bhure, Shruti Muzumdar, Sanjay Mone.

श्रेयनामावली

• लेखिका : वासंती मुझुमदार
• अभिवाचन : स्वाती सुब्रमण्यम, सुमुखी पेंडसे, अजित भुरे, श्रुती मुझुमदार, संजय मोने
• संकल्पना, निर्मीती: स्वाती सुब्रमण्यम
• वितरण : मानबिंदू म्युझिक

प्रस्तावना

वासंती मुझुमदार यांच्या नदीकाठी या ललितलेख संग्रहावर आधारीत हे ऑडीओपुस्तक आपल्या भेटीस आणताना आम्हाला अत्यंत आनंद होतोय. या ऑडीओपुस्तकाचं प्रकाशन ज्येष्ठ कवी मंगेश पाडगावकर यांच्या हस्ते ३ नोव्हेंबर २०१२ रोजी झालं. नदीकाठी या मुळ पुस्तकाची प्रस्तावनाही त्यांनीच लिहिली आहे. यांनी. त्या प्रस्तावनेत ते लिहितात,
"मनावर कसल्याही हेतूचे ओझे न बाळगता, नदीकाठी उगवलेल्या हिरव्याकोवळ्या गवतातून हिंडून यावे तसा प्रसन्न अनुभव वासंती मुझुमदार यांचे हे ललित लेखन वाचताना येतो. त्या चित्रकार आहेत. त्यामुळे रंगरेषांचे उपजत वरदान त्यांना लाभलेले आहे. त्यांचे हे लेखन वाचताना कुंचल्याची लेखणी केंव्हा होते आणि लेखणीचा कुंचला केंव्हा होतो हेच कळत नाही. इथे माणसे, प्राणी, पक्षी, झाडे, घरे,नदी, फुले यांचे थक्क करून सोडतील असे तपशील आढळतात.पण हे तपशील व्यक्तित्वशून्य गर्दी करत नाहीत. यातील प्रत्येक तपशील जिव्हाळ्याच्या व्यक्तीने सांगून जावे तसे हृदगत सांगून जातो. एखादे झाड फुलांनी पानांनी गच्च भरून यावे तसे हे पुस्तक ललित लेख प्रतिमांनी बहरून आले आहे. या प्रतिमा चिकटवलेल्या नाहीत ; अनुभवाच्या फांदीफांदीतून त्या रुजून आल्या आहेत.वासंती मुझुमदार यांनी निसर्गाचे केलेले चित्रण हे केवळ रंगरेषांची रम्य क्रीडा नाही : या चित्रणातून मैत्र जीवाचे प्रकटले आहे. हे लेखन वाचताना आपल्याला आपले बाळपण भेटते, आठवणींची हिरवी पोपटी पालवी हळूवार स्पर्शून जाते. डोळे आहेत, ते सगळेच पाहतात. पण या पहाण्यात प्राण नसतो. वासंती मुझुमदार यांचे पाहणे हे अंतरीचे उमलणे आहे, याचा प्रत्यय लेखन वाचताना ओळीओळीतून येतो. रानांच्या झाडांच्या गर्दीत आपण एकटे उभे असताना डोळ्यांना झरा कुठे दिसतच नाही; पण दुरून कुठेतरी येणारा त्याचा संथ शांत आवाज मात्र जाणावतो. वासंती मुझुमदार यांचे पुस्तक वाचताना दृश्य परिसरापल्याड वाहणारा चैतन्याचा शांत प्रवाह कुठूनतरी ऐकू येत रहातो!"