"स्पंदन- Many moods of Romance"  हा केदार-विभास जोडीचा पहिलाच अल्बम! सुंदर गीतांना अनुरूप चाली देण्याची आणि ती मित्र-मंडळींच्या मैफीलीत किंवा छोट्या-मोठ्या समारंभात सादर करण्याची या दोघांनाही आवड. यातूनच काही सुरेख चालींचा जन्म झाला. सहज गुणगुणाव्याश्या वाटणा-या या चालींचं सगळ्यांकडूनच कौतुक व्हायला लागलं आणि मग केदार-विभासला ध्यास लागले ते स्वत: संगीतबद्ध केलेल्या गीतांचा स्वतंत्र अल्बम काढण्याचे! 

प्रथमत: हे स्वप्न साकार होणार की नाही या विषयी त्यांच्या मनात थोडीशी शंका होती. त्यासाठी तयार झालेल्या चाली त्यांनी जाणकारांना ऐकवल्या. जाणकारांनीही जेंव्हा त्यांच्या पाठीवर कौतुकाची थाप मारली तेंव्हा त्यांचा आत्मविश्वास वाढला आणि हा अल्बम करण्याच्या निर्णयावर त्यांनी शिक्कामोर्तब केले.